"Lalbiakzama chet dan kha Speaker dinhmun hmansualna nasa tak a nih avangin mipuite hnenah ngaihdam dil turin MNF Party chuan a phut a ni,” tiin an tarlang. 

MNF chuan, Assembly Speaker Lalbiakzama hian ni 8.9.2023 khan a dinhmun luah mek, Speaker Office-ah ngei Press Conference kovin, Speaker dinhmun lo chelh tawh thinten political party office-ah pawh an sawi ngai loh, Ruling party ṭanna sawhngheh tumin, house chhunga rorelna kalpui dan chu langsar taka ṭan lam neiin a sawi chhuak chiam a. Assembly House chhung leh pawnah pawh thu lai latu tur, ṭan lam ti lang lo tur leh House member zawng zawngte zahawmna venghimtu tur berin Press mite hmaah meuh politics-a ṭan lam nei rana thu a sawi duh ta mai hi thil mak tak a ni, an ti bawk.

House chhunga Chief Minister-in chawp leh chilha dawt chiang tak a sawi, a hnua hailana lo awm leh ta sawimawi pui a tum dante enin, Chief Minister ber hian Press Conference nei tur hian Speaker hi 'a lalna kha tak hmachhuanin a nawrlui em ni?' tih zawhna a piang nghal, MNF chuan an ti.

Speaker hian ama thu ngeia Press Conference-a a thusawite hi a sawi a nih phei chuan nihna hman sualna leh Speaker zahawmna venhim zawh lohna nasa tak anih avangin speaker atanga inhnukdawk ngam ngei turah MNF Party chuan a ngai a ni.

Assembly Speaker dinhmun hi India danpui, Constitution hnuaiah pawh sorkar laiin duh duha a thunun theih lohna turin venhimna fel tak pek a ni a. Assembly Secretariat hrang hlak siam sakin, an sum hman tur (Budget) pawh House in a vote pui ngai lova pek tura ruahmansa (charged) a ni a, mahnia thuneihna hrang nei (Authonomous) anga din a ni, an ti a.

MNF chuan, Speaker dinhmun luahtute hi Assembly house chhung leh pawn lamah pawh lai taka awm tura beisei leh ngaih, a nih laia tuna Speaker dinhmun luah mektuin ZPM Speaker ang maia Press Conference kova sorkar lo awm tawhte beihna lam hawi leh, ruling party tanna sawhngheh tumna lam hawi a sawi ve chiam ta mai hi hmun danga thleng ve ngai lo leh, Mizoramah pawh la thleng ngai lo a ni a. Politics-a hamthatna lak tuma hmanraw hman remchang lote thlenga hmang duh zel ZPM sorkar Mizoramin kan hrawn hi a vanduaithlak takzet a ni, an ti.

MNF Sawrkar liamtaah khan Mizoram Assembly chuan FCAA 2023 dodalna Resolution a pass a, a nih dan tur anga bawhzuiin, Assembly Commissioner hmingin Secretary General, Lok Sabha hnenah thlen a ni a. Mizoram Chief Secretary pawhin bawhzuiin file te pawh a nih dan tur angin a kal a, MLA inthlanpuiin a nang zui ta a ni. MNF sorkarin FCAA 2023 dodalna resolution a lo pass tawh kha ZPM sorkar lo ding ta hian a pawm zui ve mai tur a nih laiin, India ram venhimna kaihhnawiha sum hnuh luh theih  an inbeisei vang chauhvin, a hmaa nasa taka an dodal FCAA 2023 chu Mizorama hman ve an duh leh ta thut, an ti bawk a.

 "MNF sorkarin FCAA 2023 dodalna Resolution a pass a, ZPM sorkarin FCAA 2023 Mizorama hman vena tur Resolution an pass thung a ni," tih hi thudik dinglai a ni a. Ram neitu thinlung pu lo, sumdawng rilru leh sum ringawt duhna thinlung atangin he thutlukna hi ZPM sorkar hian siam an ni tih a chiang em em, an ti a. 

"Mahni sorkar Resolution putluh ngeiah pawh sorkar hmasate puhmawh tum zel leh mawhpuh tur dang dap kual chiam hi mawhphurhna lak ngam lohna, thil zahthlak tak, sorkar puitling lo zia a ni tih Zoram mipuiten kan hriat reng a tul a ni," tiin an tarlang.

Mizoram tana theihtawp chhuah mektu Joint Civil Society of Mizoram(JCSM) ten FCAA 2025 duhlohna leh a dodalna tura an hmalakna hi MNF chuan a thlawp tlat a. Ni 11.9.2025-a punkhawm an huaihawt turah pawh MNF Party mite chu kal vek turin kan inhriattir a, Mizo mipui zawng zawng pawh he hmalakna hi thlawp vek turin kan ngen a ni, tiin vawiina MNF thuchhuah chuan a tarlang.